Shefi i deputetëve të AAK-së, Besnik Tahiri ka reaguar pas deklaratës së fundit të Qeverisë, e cila u tha grevistëve se nëse vazhdojnë grevën do t’u ndalohen pagat qoftë edhe për një orë grevë, përcjell InLajmi.
Tahiri ka kritikuar Qeverinë e Kosovës, duke thënë se kërcënimi dhe shantazhimi i grevistëve është pjesë e një mendësie arrogante e autokratike, që në vend të dialogut po zgjedh përjashtimin dhe segregacionin social.
Sipas Tahirit, qëllimi i kësaj mendësie të Qeverisë është instalimi i frikës për t’i hapur rrugë dominimit total.
Tutje deputeti thekson se kjo qasje herët a vonë do të rezultojë me një kundërshtim gjithpopullor.
Postimi i plotë i tij:
Mungesa e dialogut dhe komunikimit të strukturuar ka rritur hendekun mes Qeverisë dhe sindikatave që po shtyn punëtorët në greva, e kriza sociale. Kërcënimi dhe shantazhimi i grevistëve është pjesë e një mendësie arrogante e autokratike, që në vend të dialogut, zgjedh përjashtimin dhe segregacionin social. Qëllimi i kësaj mendësie është instalimi i frikës, duke i hapur rrugë kontrollit dhe dominimit total. Kjo qasje herët a vonë do të rezultojë me një kundërshtim gjithpopullor! Përndryshe, greva si veprim sindikal është e garantuar me Ligj të veçantë (shih Ligjin e bashkangjitur). /InLajmi/
