Sekretari i Ministrisë së Financave ka kërkuar listën e punonjësve publikë që do të mbajnë greva, për t’ua ndalur pagat, e kjo ka shkaktuar shumë reagime, përcjell InLajmi.
Kryetari i LDK-së, Lumir Abdixhiku ka thënë se kjo Qeveri po shpërndan frikë e kërcënim.
Ai e ka cilësuar veprimin e fundit të Qeverisë së Kosovës si presion të drejtpërdrejtë ndaj punëtorëve të sektorit publik gjithashtu kërcënim edhe ndaj proceseve demokratike në vend.
Deputeti i ka bërë thirrje shoqërisë kosovare që të rreshtohet prapa punëtorëve të sektorit public, të cilëve u jep plotësisht të drejt për kërkesat e tyre.
Abdixhiku thotë se Kurti me frikë e kërcënim po provon t’i mbulojë të gjitha dështimet e tij.
Tutje ai thekson se ndërprerja e kontratave në këtë kohë krize, është goditja më e rëndë që një Qeveri mund t’u japë qytetarëve të vetë.
Postimi i plotë i tij:
NË VEND TË DINJITETIT, KËRCËNIM
Ky është narracioni i një pushteti autokratik që deri dje premtoi mirëqenie e zhvillim, sot shpërndanë frikë e kërcënim. Kërkimi i listave të punonjësve në grevë nga ana e Qeverisë përveçse presion i drejtpërdrejtë ndaj punëtorëve të sektorit publik është dhe kërcënim ndaj proceseve demokratike në vend dhe vet shtetit juridik.
Sot, shoqëria kosovare duhet të rreshtohet prapa mësuesve, mjekëve e shërbyesve publik që me plot të drejtë, në krizën më të madhe ekonomike, kërkojnë dialog, dinjitet e përballueshmëri.
Këtë përballueshmëri ata se gjejnë dot. Ata kanë gjetur një kryeministër që me frikë e kërcënim, provon t’i mbulojë të gjitha dështimet e tij. Ndërprerja e kontratave të tyre, në këtë kohë krize, është goditja më e rëndë që një Qeveri mund t’u japë qytetarëve të vet. Kështu nuk duhet të duket Kosova demokratike, kështu nuk duhet të trajtohen punëtorët tanë. Kryeministri i premtimeve, që sot s’mund ta mbajë asnjë, po dëshmon, si çdo ditë, që është i paaftë për të menaxhuar me vendin, kërkesat qytetare e krizat e mëdha. /InLajmi/
