Presidentja e Kosovës, Vjosa Osmani ka treguar se çfarë ka biseduar me ndërmjetësuesit ndërkombëtarë të dialogut Kosovë-Serbi, Gabriel Escobar dhe Miroslav Lajçak, përcjell InLajmi.
Osmani ka thënë se Kosovë është e përgatitur dhe po angazhohet që dialogu Kosovë-Serbi të përfundojë me njohje të ndërsjellë.
E para e shtetit ka njoftuar se në takimin me Lajçak-un dhe Escobar-in ka potencuar se Kosova është e përkushtuar të vazhdojë bashkëpunimin me partnerët ndërkombëtar.
Presidentja ka thënë se Kosova është një vend i cili është ndërtuar mbi bazat e një shoqëri multi etnike dhe i tillë do të qëndroj.
Postimi i plotë i saj:
Kosova është palë konstruktive, e përgatitur dhe e angazhuar në procesin e dialogut të përqendruar në njohjen e ndërsjellë.
Në takimin me të dërguarit e posaçëm Lajçak dhe Escobar shpreha përkushtimin e Kosovës për ta vazhduar bashkëpunimin dhe koordinimin me partnerët tanë, duke potencuar se angazhimi i vendit tonë në dialog është i bazuar në mbrojtjen e sovranitetit, rendit kushtetues dhe integritetit territorial të Kosovës, të cilat janë të paprekshme.
Kosova asnjëherë nuk ka kontribuar në tensione dhe është angazhuar vazhdimisht për paqe dhe stabilitet si dhe për zgjidhje evropiane. Vendi ynë është i ndërtuar mbi parimin e një shoqërie multietnike ku të gjithë kanë të drejta të barabarta, pa dallim etnie./InLajmi/
