Bashkimi Evropian përmes dialogut Kosovë-Serbi po mundohet të gjejë zgjidhje për çështjen e reciprocitetit për targat dhe letërnjoftimet për të shmangur kështu një tensionim të radhës në veriun e Kosovës, shkruan InLajmi.
Arritja e një marrëveshje mes të 2-ja vendeve është çështje imediate, para një shtatorit kur Kosova fillon zbatimin e reciprocitetit sipas marrëveshjes edhe me Bashkësinë Ndërkombëtare.
Por a do të arrihet një marrëveshje mes palëve ende ka “mjegull” edhe përkundër faktit që Presidenti i Serbisë, Aleksandër Vuçiq paralajmëroi një marrëveshje të mundshme brenda 10 ditëve.
Në arritjen e një marrëveshje për reciprocitetin për targat dhe letërnjoftimit besojnë edhe analistët Halil Matoshi dhe Dritëro Arifi, të cilët lënë të kuptohet se këtë herë Vuçiqi do të jetë ai që “do të lëshojë pe”.
Analisti Dritëro Arifi për Gazetën InLajmi ka thënë se me ardhjen e Lajçak-ut dhe Escobar-it këtë javë në Kosovë beson në një zgjidhje improvizuese afatshkurtër vetëm sa për të ç ‘tensionuar situatën. Ai shprehet i zhgënjyer me nivelin e diskutimeve ne dialog që pafundësisht po vazhdojnë të jenë për çështje teknike.
“Sa i përket takimit të ardhshëm që do të vijnë 2 përfaqësuesit për Ballkanin Perëndimor siç është Escobari dhe Lajçak mendoj që ardhja e tyre do të jetë pozitive. Nga ana tjetër kur po dëgjojmë temat se për çfarë do të negociohet është pak zhgënjyese e gjithë situata, sepse po flasin vetëm për çështje të brendshme të Kosovës, asnjëherë për të ndërtuar një raport fqinjësorë me Serbinë. Nuk po arrihet të kalohen gjërat teknike të parëndësishme për Kosovën. Perëndimi po ia jep Serbisë mundësinë që të flas për Kosovën si për territorin e saj, të paktën kështu e kam kuptuar unë. Pra, derisa Perëndimi nuk e ndërron qasjen, nuk flitet për njohje reciproke, për pranimin e një realiteti të ri unë nuk shoh zgjidhje. Kjo është improvizim i radhës që nuk zgjidh asgjë në plan të shkurtër e as në atë afatgjatë. Do të jetë vetëm zgjidhje e përkohshme sa për ta ç’tensionuar situatën por nuk zgjidh asgjë” tha Arifi për InLajmin.
Arifi mendon se për të qenë e mbyllur çështja e Kosovës, siç ka deklaruar tash së fundi edhe i dërguari special, Gabriel Escobar, Perëndimi dhe SHBA-ja duhet të jenë më të vendosur dhe mos ta tolerojnë Serbinë deri në çmendurin e saj, duke iu kundërvënë forcave të NATO-s.
“Mendoj që Perëndimi dhe SHBA-ja po e tolerojnë Serbinë deri në çmenduri deri ku e kërcënon Presidenti i Serbisë edhe NATO-n, që nëse intervenon, intervenon edhe Ushtria e Serbisë. Kjo sjellje e Vuçiqit është vetëm falë Perëndimit që ia ka dhënë “ndjenjën e fitores”. Kjo mund të jetë një marrëveshje e cila zgjat agoninë e gjithë problemit përfundimtar. Mendoj që Perëndimi dhe SHBA-të duhet të jenë më të vendosur. Escobar para një kohe tha se çështja e Kosovës është e mbyllur, por duke e parë se çka po diskutohet duket se çështja e Kosovës është e hapur të paktën nga këndvështrimi im” tha Dritëro Arifi për Gazetën InLajmi.
Nga ana tjetër analisti, Halil Matoshi ishte pak më i shkurtër në deklarimin e tij por beson se deri me një shtator do te arrihet një marrëveshje për reciprocitetin e targave dhe letërnjoftimeve.
“Besoj se deri më një shtator do të arrihet marrëveshja për zbatimin e marrëveshjeve për targat dhe lejet e njoftimit. Presidentit Vuçiq po i mbaron koha” tha Matoshi./InLajmi/
