Ministria e Mbrojtjes njoftoi se ka ndaluar 4 persona të cilët po lëviznin pranë Uzinës së Poliçanit, një tjetër impiant ushtarak në vend.
“Rreth orës 08:40 të mëngjesit e së dieles, tek një nga tunelet në Uzinën e Poliçanit, janë konstatuar lëvizje të personave të paidentifikuar. Menjëherë Policia Ushtarake në bashkëpunim me Policinë e Shtetit kanë izoluar hyrjet e tuneleve të cilët janë pothuaj se të gjithë komunikues me njëri tjetrin dhe pas kërkimeve kanë ndaluar 2 persona me kombësi çeke. Rreth orës 12:30 në distancë 1.5 km larg tuneleve jashtë perimetrit të rrethimit të repartit u konstatuan dhe shoqëruan edhe dy shtetase te kombësisë çeke, bashkëjetuese të 2 shtetasve të mësipërm. Personat e mësipërm janë ndaluar dhe aktualisht vazhdojnë procedurat nga autoritetet e sigurisë në vend”, tha Ministria përmes një njoftimi për mediat, shkruan A2CNN.
Ngjarja ndodh vetëm pak orë pasi 3 persona të tjerë, 2 rusë dhe një ukrainas, u arrestuan të shtunën në mbrëmje pasi tentuan të hynin në uzinën ushtarake të Gramshit, duke lënduar me spray edhe 2 efektivë të forcave të Armatosura. Mes pistave të hetimit nuk është përjashtuar edhe spiunazhi.
