Në organizim të klubit kombëtar Automoto “Touring”, dje në shtegun e parkut të Biznesit në Prizren, u mbajtën garat memoriale automobilistike në sllallom, për Kupën e Prizrenit, shkruan Inlajmi.
Në këto gara, që për herë të parë u organizuan në Prizren, morrën pjesë 27 garues, 7 prej të cilëve ishin femra, nga Kosova, Maqedonia e Veriut dhe një garues nga Suedia, i cili garoi me automobilin “Llamborxhini”. Kurse interesimi i aderuesve të këtij sporti, jo vetëm nga qyteti i lashtë i Prizrenit, por edhe nga vendet e tjera, ishte tejet i madh.
Këto gara memoriale “Kupa e Prizrenit”, në kujtim të garuesit të parë automobilistik të Kosovës, tani të ndjerë Ramiz Bale, e që në të ardhmën pritet të jenë tradicionale, u organizuan nën patronatin e drejtorisë së Turizmit dhe Zhviillimit Ekonomik të qytetit ”. – tha për Inlajmin Sefedin Kaçamaku, kryetar i Klubit kombëtar, automoto “Touring”.
Kupa e Prizrenit, në këto gara, që u karakterizuan me një organizim tejet të mirë, i takoi Ismet Rexhepit, përndryshe kryetar i Federatës të Autosportit të Kosovës. Ndërkaq drejtoresha e Drejtorisë për Turizëm dhe Zhvillim Ekonomik në Prizren, Lirie Bytyçi, familjes Bale si dhe të gjithë garuesve, u ndau nga një mirënjohje për pjesmarrje në këtë edicion të parë të garave automobilistike. Osman Goranci /InLajmi/
