Njohësi i çështjeve të sigurisë, Drizan Shala ka folur për takimin e 18 gushtit mes kryeministrit të Kosovës, Albin Kurtit dhe presidentit të Serbisë, Aleksandar Vuçiq.
Shala tha se Kurti duhet të argumentojë në arenën ndërkombëtare që prezenca e Aleksandar Vuçiq është defakto në pjesën veriore përmes strukturave të grupeve të tij kriminale.
“Përmes takimi të 18 gushtit në mes Kurtit dhe Vuçiq mos të dalim nga ai takim me një ego, po të hyjmë në takim me argumente, fakte dhe dëshmi të cilat i ka kryeministri përmes mekanizmit të tij të sigurisë në Republikën e Kosovës që ta argumentoj në arenën ndërkombëtare që prezenca e Aleksandar Vuçiq është defakto në pjesën veriore përmes strukturave të grupeve të tij kriminale”, tha ai.
Në emisionin “Ditari” në Tëvë1 eksperti i sigurisë theksoi se në takimin Kurti – Vuçiq duhet të kërkohet të arrihet një marrëveshje përfundimtare.
“… duhet të kërkohet në arenën ndërkombëtare që të ketë edhe sanksione dhe njëkohësisht të ofrohet një alternativë sa i përket gjetjes së zgjidhjes së kësaj çështje sepse ne nuk mund të jemi peng e asociacionit ku kjo tematikë mund të na pengoj me vite të tëra dhe të na pengojë në arritjen e rrugës së integrimit të Kosovës në arenën ndërkombëtare, në Bashkimin Evropian dhe cenimin sigurisë së brendshme”, tha Shala.
