Deputetja e Lidhjes Demokratike të Kosovës, Hykmete Bajrami ka thënë se qytetarët po kërkojnë llogari nga qeveria e tanishme për projektet dhe premtimet e parealizuara, përcjell InLajmi.
Bajrami tha se Ministri i Financave dhe Transfereve, Hekuran Murati po përmend shpesh herë opozitën, por sipas saj nuk po i përmend projektet e parealizuara.
Ish-ministrja ka thënë se pushteti i tanishëm ka premtuar që ti ndërtojë 160 çerdhe publike, por nuk është ndërtuar asnjë prej tyre.
Tutje deputetja e LDK-së ka thënë se shumë projektet rrugore të premtuara nga Qeveria Kurti nuk janë realizuar në 2 vite qeverisje.
Në fund Bajrami ka theksuar se qytetarët janë duke kërkuar llogari për të gjitha premtimet që sipas saj u janë bërë atyre dhe deri tani nuk janë realizuar.
Postimi i plotë i saj:
Qytetarët po kërkojnë llogari, zero projekte, partia në pushtet merret me opozitën.
Ministri Murati sot me mëngjes ishte marrë me opozitën. Në një reagim kishte përmendur 9 herë OPOZITËN.
Pra, ka përmendur 9 herë opozitën ndërkaq për gati 2 vjet qeverisje nuk i kanë 9 projekte. Jo 9 projekte. Por, asnjë projekt. Bash asnjë. ZERO.
Ku janë çerdhet e premtuara? 160 çerdhe publike janë premtuar nga partia në pushtet. A është ndërtuar të paktën një? JO!
Ku janë banesat për të rinjtë, për arsimtarët? Janë premtuar mbi 2 mijë banesa. Asnjë nuk është ndërtuar deri tash.
Çka po ndodhë me rrugën Prishtinë- Podujevë?
Me rrugën Prishtinë – Mitrovicë?
Me rrugën Kijevë – Zahaq?
Rrugën për Tetovë?
Terminet nëpër ambasada veç sa po rriten?
Qytetarët po largohen nga Kosova!
Mjekët po ikin!
Rrymën e keni shtrenjtuar dhe siç po duket do ta shtrenjtoni prapë?
Zgjohuni e punoni diçka, aq shumë po merrni me opozitën saqë po krijohet përshtypja që ne jemi në Qeveri e ju në opozitë.
Hekuran Murati kishte thënë se edhe investimet kapitale do të bëhen. Qytetarët iu kanë votuar për të realizuar projekte kapitale e jo për të dhënë premtime kur udhëhiqni me gjithçka.
Thirrja në 14 shkurtin nuk iu kryen punë. Sepse nga mospuna keni mbetur veç katër komuna. Dhe, ndëshkimi me votë do të ndodhë shpejt edhe në nivel nacional. Ndoshta, më shpejt se sa ka menduar opozita.
Qytetarët po kërkojnë llogari, po kërkojnë realizim të premtimeve për çka keni ardhur në pushtet./InLajmi/
