Komuna e Prishtinës ka marr vendim të ndalojë qarkullimin e trotinetëve elektrikë në sheshet e kryeqytetit dhe hapësirat ku ka numër të madh të këmbësorëve, deri në marrjen e një rregulloreje për këto mjete. Në anën tjetër, qytetarët e mirëpresin këtë vendim, duke u shprehur të shqetësuar me shpejtësinë e tyre deri në këtë periudhë.
Nga e hëna, këta trotinetë elektrikë do të ndalohen për qarkullim në sheshet e kryeqytetit.
Përveç tyre, ndalesa ka edhe për biçikletat elektrike dhe motoçikleta në të gjitha hapësirat ku ka numër të madh të këmbësorëve.
Sipas kryetarit të Prishtinës, Përparim Rama kjo ndalesë është e përkohshme deri në marrjen e një vendimi për këto mjete.
“Kjo urdhëresë do të hyjë në fuqi prej të hënës, deri në votimin dhe publikimin e rregullores në të cilën jemi duke punuar për të siguruar mbarëvajtjen e qarkullimit të këtyre mjeteve sa i përket sigurisë së qytetarëve të Prishtinës, veçanërisht sigurisë së fëmijëve”, ka shkruar Rama në Facebook.
E nga këto mjete, sipas qytetarëve më të rrezikuar kanë qenë prindërit që ishin bashkë me fëmijë.
Fatime Bullaku thotë se pavarësisht që është i vonuar si vendim, është i duhur, shkruan Tëvë1.
Javëve të fundit, shumë qytetarë janë ankuar se ngasësit kanë qarkulluar me shpejtësi shumë të madhe rrugëve të Prishtinës, pavarësisht që ka mungesë edhe të infrastrukturës në këto pjesë.
