Byroja Kosovare e Sigurimit, ka mbajtur të mërkurën një tryezë pune, me ç’rast para gazetarëve ka prezantuar performancën e punës në planin e përgjithshëm, përcjell InLajmi.
Është shpalosur edhe implementimi i marrëveshjes për mbulimin e kostos së polisës kufitare, “Karton i Gjelbër’, për planin e arritur në këtë drejtim, sikur edhe planifikimi për implementimin e marrëveshjes edhe në të ardhmen.
Drejtori i BKS-së Sami Mazreku, gjatë prezantimit të punës 20 mujore para gazetareve ka thënë se falë punës dhe angazhimit të madh kanë arritur këto rezultate të kënaqshme si në planin e përgjithshëm, ashtu edhe në implementimin e marrëveshjes për polisat kufitare.
“Vetëm gjatë 20 muajve të fundit Byroja Kosovare e Sigurimit ka mbyllur hiç më pakë se 11.435 lëndë, shifër kjo më e larta që nga themelimi i BKS-së e deri më tash”, tha Mazreku, duke shtuar se këto rezultate gjatë javës së kaluar i ka prezantuar edhe në Bruksel gjatë takimit që ka pasur me zyrtarë të lartë të Byrosë së Kartonit të Gjelbër.
“Më 30 shtator të vitit 2020 kur kam ardhur unë në BKS kam gjetur 5.191 lëndë aktive. Deri më 30 qershor të këtij viti në BKS kemi pranuar edhe 8.329 lëndë të reja. Falë punës dhe angazhimit të madh kemi arritur t’i mbyllim 11.435, deri sa aktive për momentin janë 2.716 lëndë” ka thënë drejtori Mazreku gjatë prezantimit të punës para gazetareve.
Sipas tij, nga numri i lëndëve prej 1.591 që ka gjetur ai kur ka nisur punën në BKS aktualisht të pa mbyllura për arsye të ndryshme kanë mbetur 840, deri sa pjesa e tjetër prej 1.245 i përkasin kohës shtator 2020 deri më tash.
Ai më tutje ka treguar se për herë të parë në BKS lëndët trajtohen dhe kompensohen në afate rekorde kohore.
Drejtori Mazreku më tutje ka bërë të ditur se një pjesë e lëndëve që janë aktive po zvarriten nga disa avokatë që sipas tij nuk po shkojnë në BKS për të nënshkruar marrëveshje.
“Apeloj të avokatet, por edhe të qytetaret që të vijnë në BKS-së t’i nënshkruajnë lëndët dhe t’i marrin mjetet menjëherë” ka thënë më tutje drejtori Mazreku.
Po ashtu, edhe auditori i brendshëm i BKS-së Kushtrim Morina ka thënë në prezantim para gazetareve se nga themelimi i Byrosë Kosovare të Sigurimit e deri më tash sivjet është hera e parë që raporti i auditorit të jashtëm ka rezultuar pa asnjë kualifikim. /InLajmi/
