Kryeministri i Malit të Zi, Dritan Abazoviq, ka vizituar privatisht qytetin e Dubrovnikut teksa ka kritikuar shtetin që tash e drejton për bombardimet në këtë qytet gati 31 vite më parë.
Abazoviq ka qenë në vizitë bashkë me ministrin e brendshëm, Filip Axhiq.
“Si fëmijë më kujtohet bombardimi i Dubrovnikut, turpi më i madh i Malit të Zi në historinë e tij moderne, pastaj një shtet i robëruar në kthetrat e nacionalizmit, urrejtjes dhe përfitimit të luftës”, ka thënë Abazoviq.
Ai është shprehur i lumtur që mund të ecë lirshëm në Dubrovnik e të flas me njerëzit e këtij qyteti të cilët i ka cilësuar si njerëz të dashur, raporton Vijesti.
Abazoviq po pretendon se po e ushtron pushtetin për të zbutur tensionet ndërmjet nacionaliteteve, transmeton Express.
Së fundmi ai e ka nënshkruar një marrëveshje me Kishën Ortodokse Serbe, akt që po ia rrezikon pozitën e kryeministrit.
