Kasëm Trebeshina (Berat, 8 gusht 1926 – Ankara, 6 nëntor 2017) ishte partizan, oficer i Drejtorisë së Mbrojtjes Popullore, nëngjyqtar, student i regjisë, dramaturg, poet e romancier shqiptar me origjinë turke, përcjell InLajmi.
Ai ishte një ndër themeluesit e Drejtorisë së Mbrojtjes së Popullit, paraardhësja e sigurimit famëkeq.
I lindur në Berat në një familje me origjinë të largët turke, Trebeshina kreu shkollimin fillor në vendlindje kurse të mesmin në Elbasan.
Më pas ai iu bashkua partizanëve dhe mori pjesë në Luftën Antifashiste Nacionalçlirimtare.
Pas mbarimit të luftës Enver Hoxha e gradoi Kapiten i Parë, krahas emrave si Kadri Hazbiu.
Studioi teatër në Bashkimin Sovjetik, por i ndërpreu studimet dhe u kthye në Tiranë ku një kohë punoi si aktor.
Botimi i tij i parë ishte drama historike “Kruja e çliruar” më 1953. Po atë vit ishte një ndër të parët në Shqipëri dhe në botë që shkroi poezi për vdekjen e Stalinit.
Një vit më vonë Trebeshina u përjashtua nga Lidhja e Shkrimtarëve dhe u dënua me 3 vjet burg, por u lirua pas vetëm 11 muajsh.
Në vitet 1955-1962 shkrimtari nuk pranoi asnjë punë, veprim që u tolerua nga autoritetet komuniste.
Kasëm Terbeshina cilësohet si personazh problematik, veprat, thëniet dhe qëndrimet e të cilit kanë zgjuar mjaft debat./InLajmi/
