Në Kuvendin e Kosovës sot po diskutohet për ngjarjet e fundit në veri, ndërsa opozita shprehet e pakënaqur me menaxhimin e situatës atje nga ana e Qeverisë, sikur edhe për mos koordinim të duhur me aleatët ndërkombëtarë në zbatimin e vendimit për reciprocitet me targat dhe dokumentet, raporton InLajmi.
Shefi i Grupit Parlamentar të PDK-së, Abelard Tahiri, duke kujtuar tensionet në veri pasi që Qeveria vendosi zbatimin e vendimit për reciprocitet me Serbinë për targat, tha se kryeministri Albin Kurti nuk ka guximin që të vendos reciprocitet të plotë me Serbinë.
Sipas tij, nëse flitet për reciprocitet të plotë me Serbinë, atëherë kryeministri Kurti do të duhej të fillonte me zbatimin e reciprocitetit në fushën e ekonomisë.
Tahiri, tha se si subjekt politik e kemi mbështetur kryeministrin kur vendosi reciprocitet për targat ngjashëm edhe për reciprocitetin për dokumente, por tha ai se ne po shohim se kryeministri po bën përpjekje të bëj reciprocitet në çështje specifike e po anashkalon reciprocitetin e plotë me Serbinë.
“Nëse do t’i përmbaheshim reciprocitetin e plotë do të duhej të niste me ekonominë. Përderisa s’ka gatishmëri për të vendosur reciprocitet të plotë, kjo përzgjedhje selektive e masave të reciprocitetit duke qenë i vetëdijshëm se Serbia dhe politikat e saja ndaj konsolidimit tonë të brendshëm janë shumë destruktive siç ishte rasti i fundit po na jep përshtypje se para se këto masa të jenë qëllim në vetvete janë qëllime instrumentale”, deklaroi Tahiri. /InLajmi/
