Ushtruesja e detyrës së Shefes së Grupit Parlamentar të Vetëvendosjes, Mimoza Kusari-Lila, në seancën e Kuvendit ku po debatohet për ngjarjet e fundit dhe tensionet në veri pas vendosjes së reciprocitetit për targat dhe dokumentet me Serbinë, filloi me kritika ndaj partive opozitare për deklarimet e tyre se veprimi i qeverisë në veri nuk ishte koordinuar me aleatët ndërkombëtarë, raporton InLajmi
Duke kritikuar partitë opozitare, Kusari –Lila, tha se deklaratat e liderëve opozitarë për moskoordinim të Qeverisë me aleatët ndërkombëtarë për veprimet në veri, janë deklarata pa argumente.
Sipas saj, ajo çfarë kanë deklaruar opozitarët, krijoi përshtypjen se ata po prisnin dështimin.
“Deklaratat e menjëhershme të udhëheqësve të partive opozitare në Kosovë se kinse veprimet nuk ishin të koordinuara me aleatët ndërkombëtarë se veriu është i pamenaxhueshëm apo se shteti nuk është eksperiment, të krijojnë bindjen se ata ishin duke pritur të ndodhte një dështim”.“Për më pak se 24 orë pasi u dhanë këto deklarata, kemi demantin nga ambasadori amerikan në Kosovë se veprimet ishin të koordinuara me ta”, tha Kusari Lila.
Ajo, kërkoi nga subjektet politike që në rrugëtimin e qeverisë të ofrojnë mbështetje të plotë dhe të besojnë më shumë në punën e qeverisë.
“Kur ndaluam referendumin serb në Kosovë ishim bashkë me një pjesë të opozitës. Dhe tani, kur Qeveria vendos për veprimin e duhur në raport me ligjshmërinë në vend duhet të jenë veprimet e Qeverisë që duhen besuar e jo të atyre që duan ta stabilizojnë vendin me patjetër”, tha ajo.
Më pas Kusari-Lila, derisa përshkroi në pika të shkurtra zhvillimet në veri, tha se strukturat ilegale serbe kanë vepruar atje para se të fillohet me zbatimin e vendimit për targat e dokumentet, dhe se fillimi i zbatimit të reciprocitetit tha ajo është bërë në koordinim me bashkësinë ndërkombëtare. /InLajmi/
