Organizata e Kombeve të Bashkuara ka siguruar se “po përcjellin nga afër” situatën në kufirin ndërmjet Kosovës dhe Serbisë dhe ka përshëndetur shtyrjen e 2 masave që hynë në fuqi të hënën, më 1 gusht dhe që prekën personat të cilët hyjnë në vend nga Serbia.
“Mund të them se po i ndjekim me shumë vëmendje ngjarjet në Kosovë dhe se përshëndesim shtyrjen e zbatimit të vendimeve që çuan në rritjen e tensioneve në terren”, tha zëdhënësi i sekretarit të përgjithshëm të OKB-së, Stephane Dujarric.
Ai deklaroi se “përfaqësuesja speciale e sekretarit të përgjithshëm dhe shefja e Misionit të Administratës së Përkohshme të OKB-së në Kosovë (UNMIK), Caroline Ziadeh, kërkoi të dielën që të gjitha palët t’i adresojnë problemet në mirëbesim përmes dialogut të lehtësuar nga Bashkimi Evropian për të forcuar stabilitetin dhe sigurinë për të gjithë”, shkruan Zëri i Amerikës.
Tensionet në kufi u shtuan të dielën, kur serbët në veri ngritën barrikada në rrugët që çojnë në kufi në shenjë proteste ndaj vendimeve të Qeverisë kosovare për aplikimin e masave për përdorimin e dokumenteve të identitetit dhe targave serbe në territorin e saj, masa që duhej të hynin në fuqi këtë të hënë. Por, Qeveria mori vendim për zgjatjen e zbatimit të vendimit edhe për një muaj.
