Anëtarët opozitar të Komisionit për Administratë Publike, Pushtet Lokal, Media dhe Zhvillim Rajonal, të acaruar shpërthejnë me kritika, kundrejt ministrit të Punëve të Brendshme dhe Administratë, Xhelal Sveçla, i cili ka anashkaluar kërkesën e ligjvënëse për të raportuar në komision, sikur edhe prezantuar Projektligjin për ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të Agjencive ekzekutive, raporton InLajmi.
Por mungesën e tij, ministri Sveçla e ka arsyetuar duke deleguar zëvendësministrin e tij Bardhyl Dobra i cili edhe prezantoi para anëtarëve të komisionit projektligjin e lartëpërmendur.
Andaj për mungesën e ministrit deputeti i PDK-së, Mërgim Lushtaku, tha ky anashkalim i komisionit nga ana e ministrit Sveçla tregon edhe se sa është i interesuar ai për projektligjin.
“Pa e nënvlerësuar askënd kisha kërkuar të ftohet ministri sepse është përgjegjës për projektligjet në fjalë. Nuk ka nevojë me na përcaktuar a lëshojmë mbledhjen a jo. Këtu është çështje llogaridhënie”, tha Lushtaku.
Kritika për mos ardhjen në komision të ministrit Sveçla pati edhe deputeti i LDK-së, Agim Veliu, i cili tha se nuk i interesojnë arsyetimet e ministrit por ai duhet të vij të raportoj.
“Edhe unë mendoj që do të duhej të ishte ministri në takim. Dhe nuk është hera e parë që ministri nuk i përgjigjet ftesës së komisionit. Meqë po e arsyetoni ministrin mua më intereson të dijë a ka komunikim mes jush dhe ministrit”, tha Veliu.
Edhe pse u kritikua ministri për injorim të komisionit, projektligjin e lartcekur e prezantoi zëvendësministri Dobra, i cili tha se në kuadër të reformës së administratës, gjegjësisht në fazën e 2-të, për racionalizimin e agjencive, ky projektligj parasheh që Agjencia për Rrezatim dhe Siguri Bërthamore dhe Agjencia për Efiçiencë të Energjisë, të shndërrohen në departamente në kuadër të ministrive përkatëse.
Dobra kërkoi miratimin e projektligjit por nuk dha detaje të tjera as edhe numrin e të punësuarëve.
Për mos dhënien e detajeve dhe numrin e të punësuarve, Dobra u arsyetua se nuk është detyrë e ministrisë caktimi i numrit të punëtorëve
“Ka pasur diskutime të brendshme dhe rritjen e kuadrove ministria për mjedis do ta vendosin dhe do t’i caktojnë edhe çështjen e stafit. Krijimi i një numri të limituar të institucioneve ka shkaktuar këtë gjendje ku jemi sot. Të pasur një agjenci për efiçencë nuk na garanton që do të ketë sukses”, tha Dobra. /InLajmi/
