Kryetari i AAK-së Ramush Haradinaj ka reaguar pas aksionit të mbrëmshëm të njësive speciale në Veriun e Kosovës, duke thënë se çdo aksion në këtë pjesë nuk duhet të lihen në gjysmë, përcjell InLajmi.
Haradinaj, tha se Kosova nuk e ka komoditetin të bëjë eksperimente, prandaj edhe operacionet për shtrirjen e sovranitetit, duhet të studiohen mirë.
Tutje, thekson kreu i AAK-së se zbatimi i rendit dhe ligjit është i pa alternativë dhe duhet të bëhet në konsultim të ngushtë me aleatët e sigurisë.
Haradinaj tha se Kosova nuk dobësohet vetëm nga bandat kriminale në veri po ajo dobësohet nga të paditurit e qeverisë.
Gjithashtu ai i ka bërë thirrje Qeverisë që të votojë Ligjet e të forcojë Policinë e Kosovës, duke apeluar për votimin e Ligjit për Paga dhe Ligjet për Sigurim Shëndetësor e Pensional.
Postimi i plotë i tij:
Kosova nuk e ka komoditetin të bëjë eksperimente. Operacionet e sigurisë për shtrirjen e sovranitetit, duhet të studiohen, të analizohen e të shpjegohen mirë. Çdo veprim i lënë në gjysmë të rrugës, siç ishte ai i mbrëmshmi, është humbje për Kosovën.
Zbatimi i rendit dhe ligjit është i pa alternativë dhe duhet të bëhet në konsultim të ngushtë me aleatët e sigurisë.
Afati prej 30 ditësh për zbatimin e reciprocitetit duhet të shfrytëzohet me shumë seriozitet.
Shteti i Kosovës nuk dobësohet vetëm nga bandat kriminale në veri, por edhe nga të paditurit e praktikantët në qeveri.
Kushtetuta e vendit është më e fortë sesa kriminelët në veri, e të paditurit e praktikantët në qeveri.
Qeveri, nëse hala je qeveri, voto ligjet e forcoje Policinë, ligjn për paga dhe ligjet për sigurim shëndetësor e pensional. Nëse s’je qeveri, do të shihet me 31 gusht. /InLajmi/
