Kryetari i Partisë Demokratike të Kosovës, Memli Krasniqi, ka vizituar sot Komunën e Mitrovicës në kuadër të turit e vizitave që lideri i opozitës ka nisur nëpër komunat e Kosovës, përcjell InLajmi.
Kryetari i PDK-së pas takimit me kryetarin e Mitrovicës Bedri Hamza, së bashku kanë parë nga afër punimet në Qendrën e Mjekësisë Familjare në Koshtovë, punimet në rrugë në Lagjen Ilirida, si dhe ato në shkollën “Eqrem Qabej”.
Krasniqi u shpreh, se si kryetar i PDK-së ndjehet i kënaqur dhe shumë krenar me punën e Bedri Hamzës në Mitrovicë, i cili për 6 muaj ka nisur më shumë projekte se sa Qeveria Kurti.
Lideri i PDK-së, nga Mitrovica edhe njëherë i bëri thirrje Qeverisë Kurti që t’i marrë parasysh kërkesat e komunave për rishikim të buxhetit për t’iu përgjigjur nevojave dhe prioriteteve të tyre.
Nga ana tjetër, kryetari i Komunës së Mitrovicës Bedri Hamza falënderoi kryetarin Krasniqi me bashkëpunëtorë për mbështetjen e plotë si nga ana e partisë, ashtu edhe përmes Kuvendit të Kosovës, ku PDK është lidere e opozitës.
Postimi i plotë i tij:
Mitrovica, qyteti i punës, historisë e kulturës, më në fund ka marrë drejtimin e duhur dhe të merituar, nën udhëheqjen e Bedri Hamzës, profesionistit e Kryetarit shembull.
Përmirësimi i infrastrukturës rrugore nëpër lagje të Mitrovicës, investimet e mëdha në shëndetësi e në arsim, rikthimi i vëmendjes në shërbimet publike cilësore dhe të sigurta, mbështetja e madhe për kulturën, sportin e rininë – janë vetëm disa nga prioritetet me të cilat Kryetarin Hamza dhe ekipin e tij i gjetëm të angazhuar.
Vizioni i Kryetarit Hamza për transformimin e Mitrovicës, që në fokus ka përmirësimin e jetës dhe mirëqenies së qytetarëve, është konkret, i matshëm dhe i arritshëm. Duke e njohur Bedriun prej vitesh, jam më se i bindur që të gjitha planet e tij për Mitrovicën do të jetësohen.
Por, fatkeqësisht, vullneti, dija e angazhimi i Kryetarit Hamza dhe ekipit të tij po hasë në pengesa aty ku nuk do të duhej – në Qeverinë e Kosovës. Diskriminimi i Qeverisë ndaj komunave që udhëhiqen nga opozita, po e tejkalon çdo kufi. Qytetarët e Kosovës duhet të trajtohen të barabartë nga Qeveria, pavarësisht se ku jetojnë ata. Ky është minimumi që duhet të bëhet! /InLajmi/
