Ish-kryeministri i Kosovës njëherësh njohës i fushës së ekonomisë, ka reaguar ndaj qasjes së Qeverisë së Kosovës në raport me situatën ekonomike në vend, ndërsa kritikon qeverisjen se po mban rreth 210 milionë euro në bankë për të cilat ai thotë se mund të devalvohen nga inflacioni i lartë, përcjell InLajmi.
Hoti ka thënë tutje se në një situatë inflacioni tepër të lartë me afër 600 milionë euro para të gatshme në llogari, është e papranueshme që Qeveria nuk i indekson pensionet skemat sociale, sipas normës së inflacionit.
Gjithashtu sipas tij është e papranueshme edhe fakti pse Qeveria nuk heq akcizën e derivateve për të ulur çmimin e tyre.
Ai ka pyetur Qeverinë se pse po mbanë 600 milionë euro në llogarinë bankare ndërsa thekson se pret nga ekonomistët e qeverisë ta shpjegojë këtë për qytetarët.
Sipas tij ky nivel i bilancit bankar të Qeverisë përbën edhe abuzim me detyrën sepse me ligj Qeveria ka të drejtë të mbledh tatime, por duke ruajtur baraspeshën sociale dhe ekonomike.
Postimi i plotë i tij:
Bilanci bankar i Qeverisë më 30 qershor 2022 ka arritur gati 600 milionë euro, që është afër 7% e Produktit të Brendshëm Bruto (PBB). Kjo është shumë përtej kufirit të bilancit bankar të nevojshëm që duhet të ketë Qeveria për të qenë mjaftueshëm likuide, që është rreth 4.5% e PBB-së apo rreth 390 milionë euro.
Ky nivel kaq i lartë i bilancit bankar nënkupton se Qeveria po mban rreth 210 milionë euro pa asnjë nevojë, të cilat mjete po devalvohen edhe nga inflacioni i lartë. Sikur këto mjete të qarkullonin në ekonomi, ato do të multiplikoheshin dy deri në tre herë, duke rritur kështu kërkesën agregate dhe rrjedhimit të ardhurat, konsumin dhe punësimin.
Në një situatë inflacioni tepër të lartë, dhe me afër 600 milionë euro para të gatshme në llogari, është e papranueshme pse Qeveria nuk i indekson pensionet, skemat sociale, pagat dhe subvencionet në bujqësi sipas normës së inflacionit. Për më tepër, nuk e heq përkohësisht as akcizën në derivate për të ulur çmimin e derivateve dhe, rrjedhimisht, të shumë produkteve të tjera, çmimi i të cilave ndikohet shumë nga kostot e transportit.
Përse duhet Qeveria të mbajë 600 milion euro në llogarinë e saj bankare?! Pres që ekonomistët e qeverisë të shpejgojnë këtë për qytetarët.
Kjo gjendje paraqet papërgjegjësi dhe paaftësi për të udhëhequr shtet – e kam fjalën për shtet me ekonomi të tregut.
Ky nivel i bilancit bankar të Qeverisë përbën edhe abuzim me detyrën, pasi ligji i jep të drejtë Qeverisë të mbledh tatime, por duke ruajtur barazpeshën sociale dhe ekonomike. /InLajmi/
