Avokati Dastid Pallaska, i cili është pjesë e ekipit mbrojtës të ish-presidentit Hashim Thaçi në Hagë, vlerëson se fakti se Kosova nuk ka mundësi që të raportoj në Asamblenë Parlamentare të Këshillit të Evropës, nuk duhet t’i pengoj institucionet e vendit që t’i drejtohen Këshillit të Evropës me një njoftim lidhur me raportin e Dick Martyt.
“E kemi një rezolutë të Asamblesë Parlamentare të Këshillit të Evropës e cila e thërret Kosovën për të ndërmarrë veprime specifike, Kosova këto veprime specifike i ka ndërmarrë, madje i ka tejkaluar dhe normalisht që duhet të shpërblehet, qoftë edhe në mënyrë deklarative për përmbushjen e obligimeve të veta dhe nën dritën e kërkesave të Shqipërisë që të konstatohet se pavarësisht kryerjes së këtyre detyrimeve, kryerjes së hetimeve shteruese u konstatua se akuza kryesore mbi të cilën është bazuar ai raport i pavërtetë doli që të ishte fiksion, sepse në asnjë nga aktakuzat që janë objekt shqyrtimi në Dhomat e Specializuara nuk përfshihet fare ky pretendim për trafikim me organe njerëzore” tha Pallaska.
Pallaska, tha se të njëjtën gjë do të duhet ta bënte në emër të Kosovës edhe Prokuroria e Specializuar, shkruan Klan Kosova.
“Ata do të mund të përfundonin hetimet, do duhej ta konstatonin, për shembull kur fillon një hetim penal zhvillohet hetimi penal, për pjesët e hetimit penal që mblidhen prova, lëshohet një aktakuzë, për pjesën tjetër e cila është hetuar dhe për të cilën nuk ka prova të mjaftueshme për të nxjerrë një aktakuzë nevojitet një vendim formal procedural me të cilin konstatohet përfundimi i hetimit dhe hudhja poshtë e kallëzimit penal në mungesë të provave për të ngritur aktakuzën” tha Pallaska.