Sot bëhen 4 vjet që kur u nda nga jeta veprimtari i çështjes kombëtare, Adem Demaçi, i cili ndërroi jetë në moshën 82 vjeçare, përcjell InLajmi.
I njohur si Mandela i Kosovës, Adem Demaçi ishte veprimtar i kauzës kombëtare në kohën e Jugosllavisë dhe luftonte për barazinë e Kosovës me republikat e tjera.
Për angazhimin e tij politik, Adem Demaçi vuajti 28 vjet në burgjet e Jugosllavisë. Pasi u lirua ai menjëherë vazhdoi aktivitetin e tij politik.
Demaçi udhëhoqi Këshillin për të Drejtat dhe Liritë e Njeriut (KMDLNJ) nga viti 1990-1995. Në vitin 1991 u nderua nga Parlamenti Evropian me Çmimin Saharov. Gjatë periudhës 1998-1999, kur mbaheshin takimet në Rambouillet për të ardhmen e Kosovës, ai ishte zëdhënës politik i UÇK-së. Ishte njëkohësisht kryetar i Lidhjes së Shkrimtarëve të Kosovës 2005-2007.
Në kujtim të 4 vjetorit të vdekjes së Demaçit, sot përurohet libri “Libri i burgosur-gjarprinjtë e gjakut”, i autorit Selatin Novosella në ora 10:00, në Shoqatën e të Burgosurve Politikë të Kosovës. /InLajmi/
