Gjatë ditës së hënë u raportua se në fshatin Pogragje të Gjilanit një kamion është vetaksidentuar, ku si pasojë e këtij aksidenti vozitësi ishte në gjendje të rëndë shëndetësore, përcjell InLajmi.
Lajmin për Gazetën InLajmi e ka konfirmuar zëdhenësi i Policisë së Kosovës për rajonin e Gjilanit, Ismet Hashani, i cili deklaroi se vozitësi pasi që është dërguar në Spitalin Rajonal të Gjilanit ka vdekur edhe pse mjekët tentuan ta mbanin në jetë, por që i njejti nuk ia doli t’iu bëjë ballë plagëve të marra nga aksidenti.
Sipas njoftimit nga policia kamioni pas aksidentit me një vetur të tipit pikap e humb kontrollin dhe përplaset me murin skaj rrugës.
“Ju njoftojmë me informatë shtesë se sot më 25.07.2022 rreth orës 14:12 në dalje të fshatit Pogragjë është shkaktuar aksident trafiku në mes të një kamioni dhe një veture e llojit pikap, me tabela vendore, me këtë rast, drejtuesi i kamionit e humb kontrollin mbi drejtimin e mjetit të tij dhe më pastaj, pas një distance të konsiderueshme, përplaset për një muri skaj rruge. Ndihma e shpejtë personin e aksidentuar (drejtuesin e kamionit) me urgjencë e kanë dërguar në emergjencën e Spitalit Rajonal në Gjilan”, shtoi ai.
“Edhe përkundër ndihmës së mjekëve, personi i aksidentuar, i lindur më 1960, shtetas i Kosovës, ka ndërruar jetë si pasojë e plagëve të marra në aksident”, tha Hashani. /InLajmi/
