Në 8-të ministri dhe në Zyrën e Kryeministrit do të kryejnë detyrat dhe obligimet e tyre 100 praktikantë, raporton InLajmi.
Kështu u tha sot në promovimin e punësimit multietnik në institucione, organizuar nga Zyra për Çështje të Komuniteteve në kuadër të Zyrës së Kryeministrit.
Me këtë rast Kryeministri i Kosovës, Albin Kurti, tha se përveç në këto institucione, do të ketë vend edhe në disa komuna të Kosovës.
“8-të ministri dhe Zyra e Kryeministri do të jenë vendet në të cilën këta 100 praktikant do të mund t’i kryejnë detyrat dhe angazhimet e tyre. Por jo vetëm kaq por edhe në gjithsej 16 komuna e organizata do të ketë vend për ta. Ju siguroj se do ta keni përkrahjen time për fillim të karrierave tuaja profesionale. Këto institucione nuk janë të qeverisë por janë të juaja. Ju nuk i përkisni vetëm komunitetit tuaj por profesionit qe do ta zhvilloni pa pengesa”, u shpreh kryeministri Kurti.
Nga ana tjetër, zëvendëskryeministrja e Kosovës, Emilija Redzepi, tha se Qeveria e Kosovës do ta ketë prioritet punësimin e këtij komuniteteve.
“Kam nderin që si çdo vit t’i përkrahim këtë ide të cilën ambasada norvegjeze bashkë me institucionet tona dhe zyrën për komunitete ofron seanca që ju të kyçeni në sistem të qeverisjes kosovare si në nivel qendror ashtu edhe në nivel lokal. Mendoj që kyçja juaj në të gjitha institucionet tregon se ne jemi të gjithë njëjtë por i kemi disa specifika, kjo është një pasuri e madhe, ne para se gjithash jemi njerëz”, theksoi Redzepi./InLajmi.
