Bashkësia Islame e Kosovës njofton se nga Meka sot është kthyer edhe grupi i fundit i haxhive kosovarë, përcjell InLajmi.
Të kthyerit nga haxhillëku në Aeroportin e Prishtinës janë pritur nga familjarët e tyre.
Sipas njoftimit nga Bashkësia Islame e Kosovës, bëhet e ditur se organizimi i sivjetmë i haxhit ka shkuar sipas rregullave dhe planit të paraparë.
Gjithnjë sipas njoftimit zyrtar nga BIK, mësohet se këtë vit nga Kosova, haxhin e kryen 741 kosovarë.
Njoftimi i plotw nga Bashkësia Islame e Kosovës:
Grupi i fundit i haxhive kosovarë, të cilët këtë vit kryen haxhin në vendet e shenjta, është kthyer sot në Kosovë. Ata kanë ateruar në orën 10:40 në Aeroportin Ndërkombëtar “Adem Jashari”. Në pritje të tyre kishin dalë familjarë të shumtë, të cilët të mallëngjyer e me lot gëzimi uruan haxhitë për haxh e ibadetete të pranuara.
Haxhitë tanë, në mënyrë të organizuar, grupe-grupe, kanë filluar udhëtimin drejt vendeve të shenjta më 28 qershor 2022. Ata fillimisht kanë vizituar Mekën, ku edhe kanë kryer ceremoninë e haxhit, ndërsa më 13 korrik 2022, ata kanë filluar vizitën në qytetin e Medinës.
Bashkësia Islame e Kosovës njofton se organizimi i sivjetmë i haxhit ka shkuar sipas rregullave dhe planit të paraparë. /InLajmi/
