Ministri i Mbrojtjes, Armend Mehaj, ka shprehur mirënjohje për angazhimin e policisë së Kosovës, në mbrojtjen dhe sigurin e rendit publik, përcjell InLajmi.
Mehaj në rrjetin e tij social Facebook, ka postuar një foto me disa policë të Kosovës, derisa ka shkruar se ata duke rrezikuar jetën e tyre në krye të detyrës, janë duke na bërë krenar të gjithëve.
Gjithashtu u ka uruar shërim të shpejtë policëve të lënduar gjatë operacionit të së dielës.
Kujtojmë se gjatë një operacioni kundër kontrabandës në Komunën e Leposaviqit, 5 zyrtarë policorë u lënduan, pasi të dyshuarit kishin goditur veturën e policisë.
Postimi i plotë i tij:
Mirënjohje maksimale për Policinë e Kosovës, gardianen tonë të sigurisë dhe rendit publik.
Në emrin tim, Ministrisë së Mbrojtjes dhe gjithë ushtarakëve të FSK-së shprehim mirënjohjen maksimale për policët tanë, gra e burra heroik, gardianë të sigurisë dhe rendit tonë publik, si dhe luftëtarë të pakompromis në zbatimin e ligjit.
Rasti i fundit, kur duke rrezikuar edhe jetën e tyre dhe qëndruar fuqishëm në krye të detyrës, kundër kontrabandës dhe krimit të organizuar, na bënë shumë nder dhe krenar të gjithëve, krahas përgjegjësisë së të gjithëve që të përkrahim fuqishëm Policinë tonë.
Policëve të lënduar gjatë operacionit të fundit, u urojmë shërim sa më të shpejtë dhe kthim në detyrat, shërbimin dhe misionin e tyre të shenjtë. /InLajmi/
