Serbia u’a ka ndaluar pingpongistëve kosovarë pjesëmarrjen në Kampionatin Evropian të Pingpongut U-21, i cili po mbahet në Beograd, përcjell InLajmi.
Këtë e ka bërë të ditur Komiteti Olimpik i Kosovës në rrjetin social facebook, duke thënë se kjo është diskriminuese ndaj sportistëve të vendin tonë.
Gjithashtu thuhet se KOK-u ka qenë në kontakt të vazhdueshëm me Federatën e Pingpongut të Kosovës gjatë procesit të pjesëmarrjes në Evropian.
Njoftimi i plotë nga Komiteti Olimpik i Kosovës:
Politika serbe sërish përzihet në sport, pingpongistëve iu mohohet pjesëmarrja në Evropian!
Politika serbe vazhdon të përzihet në sport, dhe atë duke diskriminuar sportistët tanë.
Rasti i fundit ndodhi me pingpongistët tanë, të cilëve iu mohua pjesëmarrja me të drejta të barabarta me shtetet tjera në Kampionatin Evropian të Pingpongut U-21, që po mbahet në Beograd të Serbisë.
Komiteti Olimpik i Kosovës (KOK) ka qenë në kontakt të vazhdueshëm me Federatën e Pingpongut të Kosovës gjatë procesit të pjesëmarrjes në Evropian, për çka dënojmë veprimin e radhës të përzierjes së politikës serbe në sport, e që nuk është rasti i parë, kur bëhet fjalë për sportistët tanë.
KOK shpreson që Federata Evropiane e Pingpongut (ETTU), të marrë masat e nevojshme ndaj organizatorit të Evropianit, në këtë rast Serbisë, me besimin se diskriminimet e tilla do të marrin fund një herë e përgjithmonë. /InLajmi/
