Mijëra zjarrfikës luftuan me më shumë se 20 zjarre që shpërthyen të mërkurën në të gjithë Portugalinë dhe Spanjën perëndimore, duke kërcënuar fshatrat dhe duke ndërprerë pushimet e turistëve mes një valë të nxehti që shtyu temperaturat mbi 45 gradë Celsius në disa pjesë të Evropës.
Në Francë, qindra zjarrfikës, të mbështetur nga 6 avionë bombardues me ujë, luftuan 2 zjarre në jugperëndim, të cilat shkaktuan evakuimin e mijëra kampistëve.
Disa fshatarë në Santiago de Guarda në rrethin qendror portugez të Leiria, shpëtuan kafshët shtëpiake, ndërsa të tjerë ndihmuan zjarrfikësit të luftonin me flakët.
Në Leiria, ku mbi 3 mijë hektarë janë djegur deri më tani, autoritetet bllokuan autostradat kryesore dhe rrugët anësore pasi erërat e forta e bënë më të vështirë për zjarrfikësit luftimin e flakëve.
Autostrada më e rëndësishme e Portugalisë, që lidh kryeqytetin e saj Lisbonën me Porton, u bllokua gjithashtu për shkak të një zjarri tjetër më në veri.
Gati 900 zjarrfikës po luftonin 3 zjarret aktive vetëm në Leiria, ndërsa në të gjithë territorin e Portugalisë kishte 2.841 zjarrfikës në terren dhe 860 automjete
Rreth gjysma e Portugalisë së goditur nga thatësira do të mbetet në alarm të kuq për kushtet ekstreme të nxehtësisë të enjten, me temperaturat më të larta që priten në rrethet Santarem dhe Castelo Branco, tha instituti i motit IPMA.
Temperatura më e lartë e së mërkurës u regjistrua në qytetin qendror të Lousa në 46.3 gradë, një gradë nën një rekord të vitit 2003.
Të paktën 135 persona kanë pësuar lëndime kryesisht të lehta që nga fillimi i zjarreve në Portugali javën e kaluar dhe rreth 800 njerëz janë evakuuar nga shtëpitë e tyre, sipas Autoritetit të Mbrojtjes Civile, shkruan Reuters.
Organizata Botërore Meteorologjike paralajmëroi të martën se vala e të nxehtit po përhapet dhe po intensifikohet në pjesë të mëdha të Evropës, transmeton Klankosova.tv.
Me ndryshimet klimatike të shkaktuara nga njerëzit që shkaktojnë thatësira, numri i zjarreve ekstreme pritet të rritet me 30 % brenda 28 viteve të ardhshme, sipas një raporti të OKB-së të shkurtit 2022.
