Ministria e Shëndetësisë, ka njoftuar se Certifikata e vaksinimit ndaj koronavirusit tashmë është funksionale për përdorim në shtetet e BE-së, përcjell InLajmi.
Përmes njoftimit nga MSH-ja thuhet se në mënyrë që qytetarët të mos kenë asnjë problem rreth përdorimit të saj, çdo qytetar i vaksinuar me vaksinën kundër koronavirusit duhet të hyjë në platformën e-kosova dhe ta shkarkojë përsëri certifikatën.
Më tej thuhet se çdo certifikatë e shkarkuar pas datës 11 korrik 2022 është funksionale për të gjitha vaksinat.
Njoftimi i plotë nga Ministria e Shëndetësisë:
Certifikata digjitale e vaksinimit kundër COVID-19 e Kosovës funksionale në vendet e Bashkimit Evropian
Pas njoftimit ditë më parë nga Sekretariati i EU digital Certificate i Komisionit Evropian se është konfirmuar pranueshmëria –vendimi mbi ekuivalencën e certifikatës digjitale të vaksinës kundër COVID-19, e lëshuar nga Kosova në EU digital certificate, me qëllim lehtësimin e së drejtës së lëvizjes së lirë brenda shteteve të Bashkimit Evropian, Ministria e Shëndetësisë është informuar se certifikata është funksionale për përdorim në shtetet e BE-së.
Në mënyrë që qytetarët të mos kenë asnjë problem rreth përdorimit të saj, çdo qytetar i vaksinuar me vaksinën kundër COVID-19 duhet të hyjë në platformën e-kosova dhe ta shkarkoj përsëri certifikatën.
Çdo certifikatë e shkarkuar pas datës 11 korrik 2022 është funksionale për të gjitha vaksinat dhe e lexueshme në pikat hyrëse dhe kontrolluese brenda shteteve të Bashkimit Evropian. /InLajmi/
