Deputetja e pozitës, e cila është pjesë e Listës “Guxo”, ka thënë se gjuha e përdorur nga kolegia e saj, Fitore Pacolli, e cila i kishte kërkuar Qeverisë së Kosovës, t’i kontrollonte mediat, nuk ka qenë gjuha e duhur.
Kica–Xhelili ka thënë se nëse deputetja Pacolli ka menduar që t’i disiplinojë mediat, ajo automatikisht distancohet nga ajo.
“Në kuptim të interpretimin që deputetja ka mendu diciplinimin e mediave, unë distancohem automatikisht, nëse interpretohet ashtu”, ka deklaruar ajo.
Tutje, ajo ka bërë të ditur, se deputetja Pacolli i kishte thënë asaj, se vetëm e ka cituar rezolutën e Parlamentit Evropian, e cila sipas saj flet për transparencën e pronësisë mediale.
Por sipas saj, nuk është justifikim të thuash diçka dhe të dalësh më pas të thuash se “kam menduar diçka tjetër”.
“Në rastin konkret, rezoluta thotë që shtetet duhet të kenë vëmendje më shumë për pronësinë mediale për shkak të investimeve, për burimet e dyshimta. Ajo që deputetja ka dashur të thotë është recitimi i kësaj rezolute, unë pajtohem që nuk e ka bërë në mënyrën e duhur”, ka thënë ajo.
Po ashtu, Kica–Xhelili, ka thënë se nuk është në rregull që deputetja Pacolli të “dehumanizohet” dhe të mos lejohet ta arsyetojë atë që ka thënë.
Ajo ka bërë të ditur, se deputetja Pacolli, i ka “sqaruar”, se qëllimi i saj ka qenë të flasë për pronësinë mediale, dhe jo për kontrollim të mediave, tha ajo në RTV Dukagjini.
“Në sqarimin që ma dha mua, ka të bëjë për një rivlerësim për transparencën e pronësisë mediale, kur flasim për pronësinë mediale, nuk flasim vetëm për pronësi televizive, por edhe të shkruara, shpesh nuk e dimë se kush qëndron prapa tyre”, ka deklaruar ajo.
