Nënkryetarja e Partisë Demokratike të Kosovës, Vlora Çitaku, në një konferencë për media i ka bërë thirrje Kryeministrit Kurti që të rikthehet në Kosovë dhe të merret me shqetësimet dhe problemet e qytetarëve, raporton InLajmi.
Çitaku ka thënë se në një kohë kur Kosova po ballafaqohet me krizën më të madhe ekonomike, Kurti ka zgjedhur të ikë nga vendi që ti kaloj krizat nëpër vizita.
“Në këtë kohë kur shumica e familjeve kosovare po ballafaqohen me krizën më të madhe ekonomike, me rritjen enorme të çmimeve të produkteve bazike për jetesë, kryeministri i vendit i cili do të duhej të ndërmerrte hapa për tejkalimin e krizës, ka zgjedhur që të ikë nga Kosova e të kalojë kohë nëpër vizita, të cilat thënë më së buti, do të mund të quheshin studimore”, ka thënë Çitaku.
Gjithashtu ajo tha se, Kurti gjatë 3 muajve ka qëndruar jashtë Kosove 45 ditë pa sjellë asnjë sukses në këto vizita.
“Nga njoftimet publike të qeverisë, vetëm gjatë 3 muajve të fundit, kryeministri Kurti ka qëndruar 45 ditë jashtë Kosovës, por, pa sjell asnjë sukses të vetëm nga këto vizita të stërzgjatura dhe tërësisht atipike për një Kryeministër në detyrë. Gjysmën e kohës në 100 ditët e fundit, kryeministri Kurti e ka kaluar jashtë Kosovës”,
Më tej Çitaku, ka shtuar se, qytetarët e Kosovës e kanë votuar Kutin për Kryeministër por çka po shohim është një inflacion.
“Qytetarët e Kosovës e kanë votuar Albin Kurtin dhe Vetëvendosjen më 14 shkurt duke besuar në premtimet e tyre. Por, ajo çka po shohin është se inflacion më të madh se çmimet, kanë pësuar vet premtimet e Kryeministrit”, ka thënë ajo. /InLajmi/
