Drejtori i Përgjithshëm i ATK-së, Ilir Murtezaj, ka mbajtur konferencë për media, ku prezantoi rezultatet e aktiviteteve të zhvilluara për periudhën janar-qershor 2022, raporton InLajmi.
Murtezaj tha se gjatë periudhës 6 mujore ATK-ja ka mbledhur 355 milion euro të hyra tatimore.
“Si rezultat i përformancës dhe të hyrave tatimore, ATK-ja në shumë fusha është institucion lider në rajon. Gjatë periudhës 6 mujore jemi vlerësuar nga FMN-ja. ATK ndër objektivat kyçe ka pasur ofrimin e shërbimeve. Si rezultat është arritur që ATK të mbledhë gjatë 6 mujorit të hyrat mbi 355 milion euro tatime. Në krahasim me planin kemi rritje prej 26.5 milionë euro, apo 8.1 %”.
Gjithashtu ai tha se Administrata Tatimore e Kosovës, ka pasur bashkëpunim me organizata ndërkombëtare.
“Ndër faktorët që kanë ndikuar në rritjen e të hyrave janë: fuqizimi i kontrollit të brendshëm, rritja e efikasitetit në mbledhjen e borxheve, njeri prej indikatorëve të përformancës ka qenë edhe funksioni i mbledhjes së borxheve, dixhitalizimi i shërbimeve ndaj tatimpaguesve 100%, shërbimet profesionale, rritja e transparencës, rritja e bashkëpunimit me institucione vendore dhe ndërkombëtare, zbatimi i rekomandimeve. Kemi pasur bashkëpunim edhe me organizata ndërkombëtare.Kjo ka bërë që të kemi rritje të hyrave tatimore. Njëra prej reformave të ATK-së është reforma e rimbursimit të tatimeve. Në këtë periudhë është arritur të bëhet edhe zhvillimi i aplikacioneve i rimbursimit të tatimeve dhe analizës së rrezikut”, u shpreh ai.
Më tej, ka thënë se, gjatë kësaj kohe është bërë aplikacioni i rimbursimit të tatimeve. /InLajmi
