Një aksident i rëndë trafiku që ndodhi mëngjesin e sotëm në rrugën Prizren-Zhur, mori jetën e një personi ndërsa të lënduar mbetën 2 të tjerë.
Në aksident u përfshinë një veturë dhe një kamionë.
I dyshuar në këtë rast është vozitësi i kamionit, i cili tashmë është ndaluar për 48 orë nga Prokuroria Themelore në Prizren-Departamenti i Përgjithshëm.
Kjo është konfirmuar edhe nga zëdhënësja e Prokurorisë, Fitore Mehmeti.
Mehmeti theksoi se drejtuesi i kamionit është ndaluar për shkak të dyshimit për “Shkaktim të rrezikut të përgjithshëm”.
“Lidhur me rastin të cilit i referoheni, ju njoftojmë se Prokuroria Themelore në Prizren – Departamenti i Përgjithshëm me urdhër të prokurorit ka ndaluar për 48 orë vozitësin e kamionit, përkatësisht personin me inicialet B.K., për shkak të dyshimit të bazuar se i njëjti ka kryer veprën penale “Shkaktimi i rrezikut të përgjithshëm” nga neni 370, të Kodit Penal të Republikës së Kosovës”, ka thënë Mehmeti.
Gjithashtu ajo tha se prokuroria brenda afateve ligjore do të vazhdojë me veprime të tjera hetimore, shkruan Lajmi.net.
2 nga personat e lënduar në këtë rast janë duke u trajtuar në Qendrën Klinike Universitare të Kosovës, kurse viktima nga ky rast thuhet të jetë pasagjeri i veturës.
