Kriza e Ukrainës ka vënë në vështirësi edhe një vend si Gjermania, e cilësuar si lokomotiva ekonomike e Bashkimit Europian. Nga pikëpamja energjetike, Gjermania varet në pjesën më të madhe nga furnizimet ruse.
Përllogaritet se gjysma e gazit natyror të përdorur në vendin europian ka si origjinë Rusinë, ashtu si dhe gati një të tretën e naftës.
Një marrëdhënie e vjetër kjo, që bashkon 2 vendet kur këto i përkisnin, të paktën pjesërisht bllokut komunist, por që me agresionin e Kremlinit ndaj Kievit dhe sanksionet e Perëndimit ndaj Vladimir Putin, merr një dimension tejet të vështirë, që nga kufizimet e sotme mund të çojnë në pezullimin total të furnizimit.
Depozita e madhe që mund të ngrohë të gjithë Berlinin
Për këtë arsyeje qeveria qendrore por edhe ato lokale po mendojnë për plane të ndryshme në rastin me të keq.
Një zgjidhje premtuese është ajo që po eksperimentohet në kryeqytetin Berlin, aty ku në fund të vitit pritet të përurohet një ndërtesë industriale e lartë rreth 45 metra, praktikisht një termos gjigant që mund të mbartë rreth 56 milionë litra ujë, sa 60 mijë bojlerë.
Kjo sasi e madhe uji, do të mbahet në gjendje të ngrohtë , pothuajse të valuar, falë paneleve diellore dhe eolike që ndodhen në gjithë vendin.
Bëhet fjalë praktikisht për një bateri që në vend që të mbajë energji elektrike mban nxehtësi, me një kapacitet 200 megawatt dhe kosto fillestare 50 milionë euro, që sipas projektuesve të shoqërisë suedeze Vattenfall mjafton e vetme për të siguruar të gjithë nevojën për ujë të ngrohët për Berlinin gjatë verës, por edhe të paktën një 10% gjatë dimrit të ftohtë gjerman, përcjell A2CNN.
”Ne e grumbullojmë kur nuk na duhet, dhe e përdorim në rast nevoje”, thonë projektuesit.
