Partia Demokratike e Kosovës, ka përkujtuar 3 vëllezërit dëshmorë Bytyçi, të vrarë nga forcat serbe para 23 vitesh, përcjell InLajmi.
Vëllezërit Bytyçi, të lindur e rritur në familje atdhetare shqiptare në Amerikë, i dolën në ndihmë atdheut dhe popullit të vet, atëherë kur më së shumti kërkohej përkushtimi dhe sakrifica.
Ata, erdhën me qindra atdhetarë të tjerë nga Amerika për çlirimin e Kosovës. Megjithëse e panë dhe ndjenë Kosovën e çliruar, ata më nuk arritën të kthehen në gjirin familjar, shkruan në përkujtim.
Postimi i plotë i Partisë Demokratike të Kosovës:
Me nderim të thellë, në përvjetorin e 23-të, kujtojmë 3 luftëtarët e UÇK-së të ardhur nga Amerika për çlirimin e Kosovës, pjesëtarë të Brigadës “Atlantiku”, Agron (23), Mehmet (21) dhe Ylli Bytyqi (25), të cilët u vranë brenda bazës ushtarake të Serbisë. Vëllezërit Bytyçi, të lindur e rritur në familje atdhetare shqiptare në Amerikë, i dolën në ndihmë atdheut dhe popullit të vet, atëherë kur më së shumti kërkohej përkushtimi dhe sakrifica. Ata, erdhën me qindra atdhetarë të tjerë nga Amerika për çlirimin e Kosovës. Megjithëse e panë dhe ndjenë Kosovën e çliruar, ata më nuk arritën të kthehen në gjirin familjar. Vëllezërit Bytyçi, ishin të mbrujtur me ndjenjat më të kulluara atdhetare dhe humane, ndjenja të cilat, regjimi kriminal serb as nuk i kuptonte, as nuk kishte konsideratë, andaj, i vranë duarlidhur, për të dëshmuar fytyrën e vet të vërtetë para botës. Urdhërdhënësit, bashkëpunëtorët e krimit dhe kryerësit e këtij krimi makabër, ende nuk e kanë marrë dënimin e merituar, për vrasjen e Agronit, Mehmetit dhe Yllit. Nderim i përjetshëm për tre vëllezërit dëshmorë të Kosovës dhe familjen Bytyçi! /InLajmi/
