Komuna e Prishtinës ka njoftuar së kanë shkarkuar nga pozita kryeshefi ekzekutiv KRM “Pastrimi”, Burim Kelmendi, përcjell InLajmi.
Ky vendim thuhet të jetë marrë nga Bordi i Kompanisë Rajonale të Mbeturinave “Pastrimi”, me pretendimin se Kelmendi ka keqmenaxhuar ndërmarrjen.
Si përfundim thuhet së është vërejtur keqperdorim i punës, punësime të paarsyeshme.
Njoftimi i plotë i Komunës së Prishtinës:
Shkarkohet nga pozita e Kryeshefit Ekzekutiv, Burim Kelmendi.
Në mbledhjen e jashtëzakonshme, Bordi i Drejtorëve të KRM “PASTRIMI”, ka konstatuar se Kryeshefi Ekzekutiv nuk ka realizuar objektivat për rritjen e kapitalit të kompanisë, si objektiv bazë i përcaktuar me Plan Biznesin e aprovuar, dhe krejt kjo për shkak të keqmenaxhimit.
Është vërtetuar se ka pasur devijime ekstreme nga parashikimet e Planit të Biznesit, ka pasur mbipunësim të paarsyeshëm dhe në kundërshtim me fuqinë ekonomike të kompanisë, si dhe është praktikuar edhe nepotizëm.
Kjo është konstatuar edhe në gjetjet e Zyres së Auditorit të jashtëm, e cila ka gjetur shumë shkelje të rënda për kompaninë, si pasojë e marrjes së vendimeve përtej kompetencave të Kryeshefit Ekzekutiv, pa aprovim nga Bordi i Drejtorëve.
Vendimi për shkarkimin nga pozita e Kryeshefit Ekzekutiv, Burim Kelmendit, hyn në fuqi sot, me datë 08.07.2022. /InLajmi/
