Kompania Rajonale e Ujësjellësit “Prishtina” e ka mirëpritur vendimin e fundit të Qeverisë së Kosovës, që obligon bizneset e gastronomisë të cilat furnizohen me ujë nga ujësjellësi publik, të shërbejnë ujë nga çezma për klientët.
Arjeta Mjeku, zëdhënëse në KRU “Prishtina”, në një përgjigje me shkrim për Telegrafin tha se ky vendim e rritë rëndësinë e ujit, “i cili është 100 % sigurtë për pije”.
“Vendimi i fundit i Qeverisë së Kosovës që konsumatorëve të gastronomisë t’u ofrohet gotë me ujë nga çezmat/krojet e tyre, për ata që janë të kyçur në ujësjellës publik, është më se i mirëpritur nga ne, ngase kjo e shton edhe rëndësinë e ujit i cili trajtohet në 3 Impiante, Shkabaj, Albanik dhe Badoc dhe është 100 % i sigurtë për pije”, thuhet në përgjigjen e Mjekut.
Sa i përket borxheve nga konsumatorët, ajo tha se janë të mëdha dhe se sektori i amvisërisë është më problematiku.
“Realisht borxhet përgjithësisht janë të mëdha, ka shumë gastronomë që janë shumë të rregullt në pagesa të shërbimeve të ujit, madje duke cilësuar që disa prej tyre janë edhe në parapagim, por prapë ka shumë prej tyre që edhe nuk janë të rregullt me pagesën e faturave të ujit”.
“Vlen të ceket se me sektorin e amvisërisë/shtëpiak kemi më së shumti probleme, për shkak që një pjesë e madhe e tyre nuk paguajnë faturat e ujit me rregull, andaj edhe janë krijuar borxhe të mëdha ndër vite”, deklaroi Mjeku.
Tutje, ajo bëri të ditur se borxhi total i të gjitha kategorive, për shërbime të ujësjellësit dhe kanalizimit është afro 50 milion euro.
Mbi 40 milionë euro është borxhi nga sektori i amvisërisë, ndërsa nga bizneset e vogla dhe ato të mëdha është mbi 7 milionë euro.
“Mbi 5 milion euro bizneset e vogla dhe mbi 2 milion euro bizneset e mëdha, ku këtu një pjesë i takon edhe sektorit të gastronomisë”, tha Mjeku.
Ndërsa, sa i përket institucioneve tha se borxhi total është 300 mijë euro.
Mjeku tutje foli edhe për nivelin e ujit në Liqenin e Batllavës dhe atë të Badocit.
“Niveli i ujit në liqenin e Batllavës sot është minus 1.52 metra nën kuotën maksimale të kapërderdhjes, ndërsa niveli i ujit në liqenin e Badocit minus 7.90 metra nën kuotën maksimale të kapërderdhjes”, shtoi ajo.
Në fund, Mjeku apeloi te konsumatorët që ta shpenzojnë racionalisht ujin, pasi siç tha, dje dhe sot po keqpërdoret me të madhe.
“Me ç’rast pikat e larta të furnizimit po kanë vështirësi në furnizim të rregullt me ujë”.
Vendimi i Qeverisë së Kosovës që lokalet e gastronomisë të cilat furnizohen nga ujësjellësi publik të shërbejnë ujë falas për klientët, ka nxitur reagime të ndryshme, shkruan Telegrafi.
Nga Oda e Hotelerisë dhe Turizmit kanë thënë se më këtë vendim “Qeveria ka cenuar pavarësinë e gastronomëve dhe të pjesës tjetër të sektorit të hotelerisë e turizmit, duke shkelur parimet e ekonomisë së lirë të tregut, por edhe duke mos e respektuar lirinë dhe integritetin personal të gastronomëve, hotelierëve dhe pronës së tyre”.
