Raportuesi i Parlamentit Evropian për Serbinë, Vladimir Bilçik, thotë se PE është e përkushtuar për anëtarësimin e Serbisë në BE, se ky është një qëndrim i qartë dhe i pandryshuar
Ai shton gjithashtu se Kuvendi insiston që një perspektivë e besueshme e zgjerimit të bazohet në vullnetin politik, përpjekjet e qëndrueshme dhe reformat e pakthyeshme në të gjitha fushat, veçanërisht në sundimin e ligjit dhe përkushtimin ndaj standardeve dhe vlerave evropiane.
“Shpejtësia e përgjithshme e përparimit të Serbisë drejt BE-së është vendimtare për sundimin e ligjit, përafrimin e plotë me politikën e jashtme dhe të sigurisë të BE-së, duke përfshirë sanksionet kundër Rusisë… Ky nuk është lajm për partnerët tanë në Serbi”, tha Bilçik.
Duke folur para Parlamentit Evropian, i cili sot duhet të miratojë raportin për Serbinë, Bilçik tha se Serbia përballet me sfida që “ishin të pranishme në fillim të negociatave të anëtarësimit” dhe që kanë të bëjnë me luftën kundër krimit të organizuar, përmirësimin e kushteve zgjedhore dhe mjedisin mediatik dhe përparimin në rrugën e Serbisë drejt integrimit evropian, raporton Tanjug.
Bilçik përshëndeti publikimin e rezultateve zyrtare të zgjedhjeve në Serbi, por gjithashtu vuri në dukje se në një situatë të lëvizjeve të mëdha gjeopolitike, problemeve sociale dhe ekonomike në Evropë dhe luftës në Ukrainë, Serbia është pa qeveri dhe se ka kaluar një kohë e konsiderueshme, transmeton Klankosova.tv.
“Aderimi në BE është prioriteti strategjik i Serbisë. Duhet të shohim se si trajtohet nga elita politike në Serbi. Është koha që Serbia të shkojë drejt BE-së, jo anash”, tha ai.
