Shkrimtari i njohur Adil Olluri, nuk la pa reaguar pasi sipas tij Komuna e Prishtinës ndau një shumë të vogël parash për edicionin e 5-të të Festivalit të Prozës Artistike “FICTION FEST”, përcjell InLajmi.
Sipas Ollurit kjo shumë e të hollave është minore siç e quan vet ai, duke thënë se mbi të gjitha është qesharake, fyese dhe poshtëruese e gjithë kjo që është bërë për një organizim kulturor.
Olluri është shprehur se ky edicion nuk do ndalet pasi do mundohen të gjejnë financim vetëm që kultura të ecën përpara.
Postimi i plotë i tij:
Komuna e Prishtinës, gjegjësisht Drejtoria për Kulturë, paska aprovuar një shumë minore, qesharake, për edicionin e pestë (jubilar) të Festivalit të Prozës Artistike “FICTION FEST”, i vetmi festival proze në vendin tonë. Një shumë e tillë është qesharake, fyese dhe poshtëruese për një organizim kulturor, çfarë është festivali në fjalë.
Udhëheqja e re e Komunës së Prishtinës (LDK-PDK) ia dha një goditje fatale “FICTION FEST-it”, por shpresoj që ai do të mbijetojë dhe do të gjejë mbështetje alternative për ta zhvilluar edicionin e tij jubilar, ashtu siç i ka hije.
Mbështetja jo e mjaftueshme, por e kënaqshme, gjatë qeverisjes së Shpend Ahmetit, qenka shuar si me magji nga udhëheqja aktuale e Përparim Ramës. Ndoshta udhëheqja aktuale e qytetit tonë nuk e konsideron kulturë letërsinë dhe prozën artistike. /InLajmi/
