Ish-nënkryetari i Skenderajt, Nuredin Lushtaku është dorëzuar në pMiolici, pas lëshimit të vendimit për ndalimin e tij nga Prokuroria Themelore në Mitrovicë.
Këtë e ka bërë të ditur për Gazetën Sinjali kryeprokurori i Mitrovicës, Ismet Ujkani.
Pas grumbullimit të provave të mjaftueshme për këtë rast, prokurori i Shtetit ka lëshuar vendimin për ndalimin e Lushtakut, por i njëjti fillimisht nuk është hasur nga policia.
Ndaj tij, Prokuroria pritet të paraqes kërkesë për caktimin e masës së paraburgimit për shkak të veprave “Sulmi ndaj personit zyrtar”, “Përdorimi i armës apo mjetit të rrezikshëm”, si dhe “Mbajtja në pronësi, kontroll ose posedim të paautorizuar të armëve”.
Lushtaku bashkë me vëllezërit dyshohen për incidentin e së shtunës ku mbetën të plagosur 2 zyrtarë policorë.
Motivi i rastit dyshohet të jetë gjoba për kundërvajtje në trafik që ata i shqiptuan Arbërit, djalit të Nuredinit.
