Kryetari i komunës së Drenasit, Ramiz Lladrovci, pas takimit të përbashkët të kryetarëve të komunave me kryeministrin Kurti, ka deklaruar se takimi ishte shumë konstruktiv dhe ka përshkruar 11 çështjet e ngritura në takim, përcjell InLajmi.
“Organizimi i takimeve si ky, janë të rëndësishëm për trajtimin e çështjeve jetike të qytetarëve dhe përgjegjësisë tonë, andaj, u dakorduam të kemi takime të tilla të rregullta 3 mujore. Rrugët, idetë dhe qasjet mund t’i kemi të ndryshme, por, do të duhej të na bashkonte interesi i qytetarit dhe efikasiteti i përbashkët në shërbim të tij”, ka deklaruar Lladrovci.
Postimi i plotë i tij:
E falënderoj kryeministrin e Republikës së Kosovës Kurti dhe zv. kryeministren znj. Rexhepi që pas kërkesës time, organizuan takimin e sotëm të Kryeministrit me kryetarët e komunave.
Takimi u zhvillua në 2 sesione dhe ishte shumë konstruktiv, ku ngrita disa çështje që janë probleme me të cilat ballafaqohen qytetarët e Komunës së Drenasit, si në vijim:
- Ndërtimi i kapaciteteve të ujit të pijshëm, me theks të veçantë ndërtimin e Liqenit të Vërbovcit,
- Vazhdimin e ndërtimit të rrugës me katër korsi Gllobar – Drenas – Komoran,
- Trajtimi i ujërave të zeza dhe ndërtimi i Impiantit,
- Zgjidhja e çështjes së tokave në zonën komasative,
- Gjetja e zgjidhjes për pagesë në mënyrë të rregullt të obligimeve që dalin nga kontratat kolektive me qëllim të ruajtjes së buxhetit dhe shmangies së shpenzimeve përmbarimore/gjyqësore,
- Problemi me kompaninë rajonale të mbeturinave,
- Problemet për përkujdesje dhe mirëmbajtje të objekteve sportive dhe kulturore,
- Rishikimin e ligjit për dhënien në shfrytëzim të pronave komunale me qëllim të lehtësimit të procedurave të sjelljes së investitorëve,
- Problemin e qenve endacakë dhe zgjidhjen e problemit të trajtimit të tyre nga niveli qendror,
- Parku i Biznesit dhe kërkesa e zhvillimit të projektit për ndërtimin Stadiumit nacional,
- Çështjen e ndërtimit të Shkollës së pilotimit në ish aeroportin bujqësor në Korroticë.
Organizimi i takimeve si ky, janë të rëndësishëm për trajtimin e çështjeve jetike të qytetarëve dhe përgjegjësisë tonë, andaj, u dakorduam të kemi takime të tilla të rregullta tre mujore.
Rrugët, idetë dhe qasjet mund t’i kemi të ndryshme, por, do të duhej të na bashkonte interesi i qytetarit dhe efikasiteti i përbashkët në shërbim të tij! /InLajmi/
