Ish-këshilltari, i ish-presidentit të Kosovës, Hashim Thaçit, Artan Behrami ka kujtuar momentin kur Gjykata Speciale la lëshuar komunikatë kundër ish-kreut të UÇK-së, Hashim Thaçit, përcjell InLajmi.
Behrami ka thënë se 2 vjet më parë kishte qenë pjesë e delegacionit të Hashim Thaçit ku ishin nisur për në Washington, ky moment sipas tij ishte ndërprerë nga komunikata e Gjykatës Speciale.
Tutje Behrami tha se tash e 2 vjet, kryetarja e kësaj gjykate, prokuroria, gjykatësit, ombudspersoni dhe Dhomat e Gjykatës Kushtetuese janë bashkuar për të krijuar një balancë artificiale ndërmjet viktimës dhe agresorit të luftës së fundit në Kosovë.
Behrami ka theksuar se UÇK-ja, bashkë me NATO-n, janë fitues të luftës së fundit në Kosovë.
Postimi i plotë i tij:
Sot, si 2 vjet më parë, isha pjesë e delegacionit të Presidentit Thaçi, ku u nisëm për në Uashington. Ky udhëtim u ndërpre vetëm 10 minuta pasi ishim nisur nga Tirana.
Derisa ishim në aeroplan, Gjykata Speciale lëshoi një komunikatë të paprecedent, kundër parimeve dhe vlerave të drejtësisë ndërkombëtare.
Atë ditë, Gjykata Speciale shpalosi qëllimet e vërteta, përndjekjen politike të krerëve të UÇK-së, mbajtjen e tyre sa më gjatë, pa aktakuzë, pa proces gjyqësor, pa proces fer dhe të paanshëm.
Tash e 2 vjet, kryetarja e kësaj gjykate, prokuroria, gjykatësit, ombudspersoni dhe Dhomat e Gjykatës Kushtetuese janë bashkuar për të krijuar një balancë artificial ndërmjet viktimës dhe agresorit të luftës së fundit në Kosovë.
Për të kriminalizuar luftën çlirimtare të popullit të Kosovës – për të ndërruar historinë!
Por, historia tashmë është shkruar në 1999!
UÇK-ja, bashkë me NATO-n, janë fitues të luftës!/InLajmi/
