Avokati Dastid Pallaksa ka thënë se gjykimi që po i bëhet ish-krerëve të UÇK-së nga Gjykata Speciale bazohet vetëm në versionin serbisht të Kushtetutës së Kosovës. Ai e tregon një rast ku përkthimi serbisht i Kushtetutës, ka bërë që një ankesë e ish-kryetarit të Kuvendit, Kadri Veseli, të refuzohet si e papranueshme edhe pse ajo ka bazë në versionin shqip dhe anglisht të Kushtetutës.
Ai thotë se ky është skandali më i madh që ka ndodhur deri më tani gjatë procesit.
“Ky është skandali më i madh që kam parë deri më tani. Ka të bëjë me kërkesën e ish-kryeparlamentarit Veseli. Një ndër rastet që e ka ngrit është parimi i ligjshmërisë. Pra parimi që askush nuk mund të dënohet ose akuzohet për një vepër që nuk ka qenë vepër penale në kohën kur është kryer. Pra të mbron nga arbitrariteti i pushteti që duhet të jetë një vepër e sanksionuar me ligj që të ndiqesh penalisht”, ka thënë Pallaska.
Ai në emisionin Pressing në T7 tregon tutje se cili është përkthimi origjinal në gjuhën shqipe dhe angleze për parimin e legalitetit.
“E tash. Në versionin anglisht i cili është versioni origjinal në të cilin është hartuar kushtetuta, pasi hartimi është bërë nga ekspertë amerikanë. Ky parimi i legaliteti shtrihet në 2 faza të procedurës. Edhe në të akuzimit dhe në të dënimit. Askush nuk mund të dënohet për një vepër që nuk ka qenë krim në kohën kur është kryer. E as nuk mund të akuzohet. E njëjta vlen edhe në gjuhën shqipe, apo në përkthimin shqip. Ndërsa në versionin serbisht sipas një gabimi që mendoj se është gjatë përkthimit, kjo parimi i legalitetit aplikohet vetëm në fazën e dënimit. Shkruan askush nuk mund të dënohet për një vepër që nuk ka qenë krim kur është kryer vepra. Zotëri Veselit i është refuzuar kjo kërkesë si e papranueshme me arsyetim se versioni autoritativ është versioni në gjuhën serbe. Tash e di se publiku do të reagojë se a është e mundur se një shqiptar i Kosovës, me një gjykatë formalisht, juridikisht të Kosovës, të gjykohet me një version serbisht të Kushtetutës, edhe pse ekziston një përkthim ndryshe në shqip dhe anglisht”, përfundoi ai.
