Ushtruesi i detyrës së kryetarit të OVL-së, Faton Klinaku ka thënë se për të pastruar listat e veteranëve janë organet e drejtësisë dhe jo fjalët në media, përcjell InLajmi.
Klinaku gjithashtu i është drejtuar veteranit, Aziz Bici i cili tha para pak ditësh se batalioni i tij kishte pasur vetëm 250 ushtarë, ndërsa tani në komision janë 600, duke i thënë se ishte ky i fundit në komisionin për vlerësim dhe verifikim të veteranëve.
Tutje Klinaku ka thënë se lojërat politike në lidhje me çështjen e veteranëve nuk i bëjnë mirë askujt.
Gjithashtu Klinaku ka theksuar se në takim me kryeministrin, Albin Kurti ka kërkuar që të rikthehet pika 3.1 e nenit 16 A.
Postimi i plotë i tij:
Individët mund të devijojnë, por mund edhe të flasin pasaktësi që t’i përshtaten pushtetit.
Sa i përket asaj që ka deklaruar Aziz Bici se në batalionin e tij ishin 250 ushtarë (e që në atë batalion isha edhe unë) e sipas tij ia paska bërë komisioni numrin 600 e vet ishte komision për vlerësim e verifikim e unë nuk kam qenë, nuk dua të merrem unë tash në publik, sepse për këtë pasaktësi të madhe i reagova edhe në takim që kishim me kryeministrin Kurti, por me këtë do të duhej që të merreshin të tjerët(komandantë e ushtarë të batalionit). Nga pozita që e kam unë, dhe duke pasur parasysh që si OVL UÇK kemi kërkuar hetim nga prokuroria dhe prandaj ka proces gjyqësor që duhet të përfundojë, nuk dua të merrem por do të ishte mirë të publikohet ajo listë prej atyre 250 vetave, e të shihen se cilët nga ata qindra ushtarët do të mbeten jashtë saj, por edhe për këtë mendoj se duhet të merret prokuroria.
Lojërat politike me këtë çështje, nuk i bëjnë nderë askujt. Edhe kryeministrit ia kemi bërë të qartë se propozimin që do të na japin me shkrim, duhet të jetë në përputhje me rikthimin e pikës 3.1 të nenit 16 A, që kjo qeveri e ky kuvend e ka ndryshuar, dhe për çdo pastrim liste janë organet e drejtësisë, e jo fjalët në media./InLajmi/
