Ukshin Hoti ishte filozof dhe veprimtar shqiptar i Kosovës. Hoti ishte profesor i së drejtës ndërkombëtare dhe më vonë i filozofisë në Universitetin e Prishtinës dhe themelues i UNIKOMB, një parti politike e Kosovës, shkruan InLajmi.
Që nga viti 1982 ai ishte arrestuar disa herë nga autoritetet jugosllave. Në vitin 1994 u dënua me pesë vjet në burgun e Dubravës.
Në maj të vitit 1999, kur i mbaroi dënimi dhe do të lirohej, rojet e burgut e zhvendosën atë.
Vendndodhja e tij nuk dihet dhe shumë aktivistë të të drejtave të njeriut e konsiderojnë atë të vdekur.
Ukshin Hoti lindi në fshatin Krushë të Madhe të Komunës së Rahovecit në kohën e Shqipërisë së pushtuar nga Italia.
. Ai studioi shkenca politike në Universitetin e Zagrebit dhe në Universitetin e Beogradit dhe kishte studime pasuniversitare në Universitetin e Çikagos, Universitetin e Harvardit dhe në Universitetin e Uashingtonit për marrëdhënie ndërkombëtare dhe shkenca politike.
Nga viti 1975, Hoti ligjëroi të drejtën ndërkombëtare në Universitetin e Prishtinës dhe mbante poste administrative në Kuvendin e Kosovës.
Në vitin 1982 ai u dënua nga një gjykatë jugosllave dhe kaloi tre vjet e gjysmë burg për mbështetjen e tij në protestat e vitit 1981 në Kosovë, megjithëse ai nuk u akuzua për përdorim ose mbrojtje të dhunës.
Në vitin 1983 Amnesty International e shpalli atë të burgosur të ndërgjegjes.
Më 28 shtator 1994, ai u dënua me pesë vjet në burgun e Dubravës për “rrezikim të rendit kushtetues të Serbisë”.
Më 16 maj 1999, ditën kur do të lirohej, ai u pa për herë të fundit i gjallë nga tre të burgosur.
Në vend që të lirohej, ai u transferua në burgun e Nishit dhe që atëherë u zhduk./InLajmi/
