Më herët Policia e Kosovës ka arrestuar kryetarin e PSD-së, Dardan Molliqaj, në bazë të një urdhër arresti të Gjykatës themelore të Prishtinë, përcjell InLajmi.
Ai arrestimin e tij e ka quajtur tendencioz nga Qeveria e Kosovës, pasi sipas tij kjo ndodhi pikërisht një ditë para protestës së veteranëve të UÇK-së dhe u lirua pas 2-3 orësh pa u dërguar në asnjë gjykatë a prokurori.
Sipas tij, kjo është përndjekje politike. Madje ai shton se policët ia kanë konfirmuar se arrestimi i tij u bë si rezultat i presionit politik.
Ai theksoi se Qeverisë Kurti po i dridhen temelet, prandaj po bën këso veprime policore joligjore.
Postimi i plotë i tij:
KËSHTU DUKET PËRNDJEKJA POLITIKE
Më arrestuan me pompozitet, në bazë të një urdhërarresti të lëshuar 16 ditë më parë, edhe ai i lëshuar jashtëligjshëm. Më liruan pas 2-3 orësh sepse s’kishin si t’më mbanin kur edhe urdhërarresti edhe arrestimi ishin të paligjshme.
Pse zgjodhën pikërisht 1 ditë para protestës së veteranëve ta aktivizojnë këtë urdhërarrest që ishte lëshuar para 2 javësh për një rast krejt tjetër?! Pse më liruan menjëherë, pa më dërguar as në prokurori e as në gjykatë?!
Kjo nuk lë asnjë dilemë. Këtë ma konfirmuan edhe policët: arrestimi ishte rezultat i qartë i presionit politik. Tentim frikësimi e shfaqje e forcës, në një kohë kur kundërshtimi qytetar po rritet ndaj kësaj qeverie.
Brutaliteti autoritar që kundërshtimin e vërtetë synon ta shtypë me dhunë, nuk ka tjetër formë. Qeverisë Kurti po i dridhen temelet, prandaj këto veprime policore joligjore. /InLajmi/
