Pas anulimit të festivalit “Sunny Hill”, Arbër Zaimi i VV-së e ka akuzuar kryeministrin e Shqipërisë, Edi Ramën për humbjen e festivalit, përcjell InLajmi.
Zaimi thotë se nuk ishte lajm se Dukagjin Lipa i publikoi datat e organzimit në Tiranë vetëm pak minuta, pasi i dërgoi letër Qeverisë së Kosovës, por lajm është sjellja e Ramës që nisi një “garë” për marrjen e këtij festivali.
Sipas tij, me sjelljen e fundit të Ramës po jepet mesazhi se tash e tutje, sa herë që Qeveria e Kosovës negocion me ndonjë biznes për të gjetur ekuilibrin mes interesave publike e private, përballë nuk do të ketë thjesht kompanitë private, por edhe Ramën.
Pjesëtari i VV-së theksoi se është diçka shumë e keqe ajo që po zhvillohet një garë e tillë mes Kosovës e Shqipërisë.
Postimi i plotë i tij:
Nuk është lajm fakti se Dukagjin Lipa i publikoi datat e organizimit në Tiranë vetëm pak minuta pasi i dërgoi letër Qeverisë së Kosovës. Pra nuk është lajm që letra e tij në fakt s’u shkrua për të pritur përgjigjen.
Por lajm është sjellja predatore e Qeverisë Rama. Po jepet mesazhi se tash e tutje, sa herë që Qeveria e Kosovës negocion me ndonjë biznes për të gjetur ekuilibrin mes interesave publike e private, përballë nuk do të ketë thjesht kompanitë private, por edhe Ramën.
Shumë keq, sepse po nisi një “garë” e tillë mes Shqipërisë dhe Kosovës, do të fitojë veç kapitali privat dhe politikanët e blerë prej tij. Kjo “garë” do ta lërë krejt të shkatërruar interesin publik. Nuk do të duhej Qeveria e Shqipërisë të niste një “garë” të pistë e predatore kundër Kosovës. /InLajmi/
