Në Kuvendin e Kosovës është votuar Projektligji për Provimin e Jurisprudencës, përcjell Inlajmi.
Lidhur me këtë ka reaguar Ministrja e Drejtësisë, Albulena Haxhiu, e cila tha se Qeveria dhe institucionet tjera të Kosovës, janë duke e dëshmuar se qytetarët e Luginës së Preshevës do ta kenë trajtimin e duhur.
Gjithashtu ajo ka falënderuar deputetët për mbështetjen e këtij projektligji.
Postimi i plotë i saj:
Deputetët e Kuvendit të Republikës së Kosovës votuan në lexim të 2-të Projektligjin për Provimin e Jurisprudencës.
Përmes këtij projektligji krahas rritjes së transparencës si dhe qartësimit të kritereve për t’ju nënshtruar këtij provimi, mundësohet që provimit të jurisprudencës t’i nënshtrohen edhe kandidatët nga vendet tjera, që kanë përfunduar studimet në vendin tonë e të cilët kanë leje qëndrimi.
Pas hyrjes në fuqi të tij, mundësohet që provimit të jurisprudencës, t’i nënshtrohen edhe një numër i konsiderueshëm i kandidatëve nga trojet shqiptare, e me theks të veçantë nga Lugina e Preshevës.
Përmës këtij projektligji por edhe angazhimeve tjera, Qeveria dhe institucionet tjera të Republikës së Kosovës, dëshmojnë se qytetarët e Luginës së Preshevës do ta kenë trajtimin e duhur.
Me këtë rast i falënderoj deputetët për mbështetjen e këtij Projektligji. /InLajmi/
