Kryetari i Prishtinës, Përparim Rama ka reaguar ndaj lajmit se është anuluar mbajtja e festivalit “Sunny Hill” në Prishtinë, krejt kjo si pasojë e zvarritjes së procedurave nga Qeveria e Kosovës, përcjell InLajmi.
Ai i ka bërë thirrje që Qeveria e Kosovës të reflektojë dhe festivali “Sunny Hill” t’i kthehet Prishtinës.
Sipas Ramës, dështimi i këtij festivali sivjet është humbje jo vetëm për Prishtinën, por për gjithë Kosovën.
Postimi i plotë i tij:
Të nderuar qytetarë të Prishtinës,
Me keqardhje të madhe mora lajmin se Festivali prestigjioz, Sunny Hill, sivjet, nuk do të mbahet në Prishtinë.
Një vendim i tillë, i shkaktuar kryekëput nga zvarritjet e Qeverisë, do t’i shkaktojë dëm kryeqytetit në kulturë, turizëm, në zhvillimin ekonomik dhe në imazhin e vet të përgjithshëm.
Dështimi i këtij festivali sivjet, është humbje jo vetëm për Prishtinën, por për gjithë Kosovën.
Qeveria e Republikës së Kosovës duke e zvarritur procesin e vendimit të ligjshmërisë, ka tentuar të ndërhyjë në vullnetin dhe integritetin e asambleistëve shumicë të Kuvendit Komunal të Prishtinës, duke bërë përpjekje të vazhdueshme për të ndërhyrë në kompetencat e Kuvendit të Komunës dhe vullnetit të shumicës, e cila përfaqëson sovranin e kryeqytetit.
Ne presim që Qeveria të reflektojë dhe Sunny Hill Festival, t’i kthehet shtëpisë së vet, Prishtinës, dinjitetshëm, ashtu siç e meriton secili qytetar i kryeqytetit. /InLajmi/
