Kryeministri i Kosovës, Albin Kurti ka uruar qytetarët e Kosovës, për miratimin e Projektligjit për pagën minimale, përcjell InLajmi.
Kurti ka thënë se me këtë ligji mbi 100.000 punëtor të sektorit privat përfitojnë rritje 100%.
Kurti ka thënë se qeveria e tij ka rritur pagën minimale për herë të parë pas 11 vitesh.
Kryeministri i ka uruar anëtarët e sapo zgjedhur të Komisionit për Autoritetin e Konkurrencës, që sipas tij për herë të parë po udhëhiqet nga një grua.
Postimi i plotë, i tij:
Lajm i mirë për qytetarët që sot Kuvendi i Republikës miratoi në lexim të parë ligjin për rritjen e pagës minimale në 264 euro dhe lirimin nga tatimi i të ardhurave deri në shumën e pagës minimale. Mbi 100 mijë punëtorë të sektorit privat përfitojnë rritje mbi 100%, respektivisht mbi 50% të pagës së tyre mujore, ndërkaq plot 380 mijë punëtorë të sektorit privat dhe publik përfitojnë prej lirimit nga tatimi i të ardhurave deri në shumën e pagës minimale. Përveç se po e rrisim pagën minimale për herë të parë pas 11 vitesh, po e rrisim atë më shumë se çdoherë tjetër më parë. Ndërkaq pragun e shkallës tatimore po e zhvendosim nga 80 euro në 250 euro.
Gjithashtu, u uroj punë të mbarë anëtarëve të sapozgjedhur të Komisionit për Autoritetin e Konkurrencës, që për herë të parë udhëhiqet nga një grua. Ky institucion ka rëndësi të madhe në mbrojtjen e konkurrencës së lirë dhe efektive në vend. Rëndësia e tij rritet edhe më shumë tani që po përballemi me një periudhë inflacioni.
E nga sot, me miratimin e Projektligjit për Provimin e Jurisprudencës, për herë të parë këtij provimi do të mund t’i nënshtrohen edhe kandidatë nga trojet tjera shqiptare, duke përfshirë ata nga Presheva, Medvegja dhe Bujanoci./InLajmi/
