Ish-ambasadorja e Kosovës në Itali, Alma Lama, thotë se shteti kosovar nuk është treguar i suksesshëm në asnjë iniciativë rajonale.
Lama thotë se Kosova është vendi që ka kapacitetet më të ulëta për të marrë pjesë dhe për t’i shfrytëzuar iniciativat rajonale.
“Ka mungesë kapacitetesh instiucionale. Merr pjesë në shumë pak iniciativa, nuk është qendra e asnjë institucioni rajonal. Janë rreth 40 organizata rajonale dhe në Kosovë nuk është asnjëra. Do të thotë është treguar tërësisht jo e suksesshme në raport me iniciativat rajonale, që janë të gjithëllojshme”, tha ajo.
Analistja Lama theksoi se edhe në CEFTA, Kosova vazhdon të përfaqësohet nga UNMIK-u. Ajo shtoi se nuk ka parë seriozitet nga Qeveritë e Kosovës për të analizuar përftimet në raport me vendet e tjera.
“Në raport me CEFTA-n nuk shoh asnjë iniciativë serioze të Qeverive të Kosovës në vazhdimësi, që janë marr me këtë marrëveshje dhe kanë parë apo analizuar përfitimet e Kosovës në raport me shtetet e tjera”, shtoi Lama.
